Sikop ang usa ka Top 4 Most Wanted Person City Level ug Top 10 Most Wanted Person Provincial Level,nga nag atubang sa kasong Statutory Rape atol sa gipatuman nga hiniusang manhunt operation didto sa Brgy. Balono, Godod, Zamboanga del Norte, niadtong Pebrero 5, 2026, mga alas 12:50 sa udto.
Ang maong operasyon nga miresulta sa malampusong pagkadakop sa nasangpit nga suspek nga si alyas “Abai” 19 anyos nga lalaki, ulitawo, construction worker, ug residente sa Purok Santan, Brgy. Burgos, Dapitan City kinsa gidakop pinaagi sa mga personahe sa Dapitan City Police Station uban sa mga personahe sa 5th SOU Mabuhay SBC, 901st MC, RMFB9, 1st ZNPMFC, ZNPIU ug 97IB,pinasikad sa warrant of arrest nga gi-isyu ni Hon Florendo Bolante Opay, Presiding Judge, Family Court, Ninth Judicial Region, Branch 4, Dapitan City, Zamboanga Del Norte nga gipetsahan Pebrero 2, 2026 alang sa krimen nga Statutory Rape nga gi-docket ubos sa CC Nr. 26-007 nga walay girekomendar nga piyansa.
Ang dinakpan gipahibalo sa hustong paagi sa hinungdan sa iyang pagkadakop ug gipahibalo sa iyang mga katungod sa konstitusyon sa usa ka diyalekto nga iyang hingpit nga nasabtan ug anaa na kini karon sa kustodiya sa Dapitan CPS alang sa hustong disposisyon.(MEDALYN U. BORJA)
Source: ZNPPO