SIKOP ang usa ka Top 1 Most Wanted Person (Municipal Level) nga nag atubang sa kasong Attempted Murder, atol sa gipahigayon nga intelligence-driven operation sa mga personahe sa kapulisan mga alas 4:35 ang takna sa hapon niadtong Enero 5, 2026 didto sa Barangay Nangca Rizal, Zamboanga del Norte.
Naila ang dinakpan nga Wanted person nga si alyas “Ron” 18 anyos, ulitawo, estudyante sa kolehiyo, ug residente sa Purok Kitong, Brgy. Nangca, Rizal, Zamboanga Del Norte kinsa gidakop pinaagi sa mga personahe sa PNP sa Rizal Municipal Police Station (lead unit), kauban ang RID9-RA-ZDN, CIDG ZDN PFU, 901st RMFB9, 1st ZNPMFC, ug ang 97th IB Bravo Company-PA.
Ang pagkasikop gihimo pinaagi sa bisa Warrant of Arrest alang sa kasong Attempted Murder ubos sa Criminal Case No. 28447, nga giisyu ni Hon. Anabelle Abella Anggot-Obordo, Presiding Judge, RTC Branch 7, Dipolog City, nga gipetsahan Disyembre 16, 2025, ug adunay piyansa nga girekomendar nga mobalor sa Php 120,000.00 para sa temporaryong kagawasan.
Ang akusado gipahibalo sa hinungdan sa iyang pagkadakop ug mga katungod sa konstitusyon sa pinulongan nga iyang nasabtan.
Samtang, ang operasyon gidokumento subay sa kasamtangang mga lagda, pagkahuman gibutang siya ubos sa kustodiya sa CIDG ZDN PFU alang sa dokumentasyon ug hustong disposisyon sa dili pa ibalik ang warrant ngadto sa nag-isyu nga korte.(MEDALYN U. BORJA)
Source: ZNPPO