Nakab-ot sa usa ka Subanen artist gikan sa Roxas, Zamboanga del Norte ang dakong kalampusan human makasulod sa Top 4 sa West Philippine Sea Mural Art Festival Competition, usa ka nasudnong patigayon nga nagtigom sa mga talento sa mural artists gikan sa nagkalain-laing lugar sa Pilipinas.
Si Jose Jerry S. Gumanad Jr., taga-Barangay Nabilid, Roxas, Zamboanga del Norte, usa sa 100 ka national finalists nga napili gikan sa 220 ka mga partisipante. Ang iyang obra nakapakita sa iyang pagkamamugnaon ug talento sa visual arts isip usa ka Subanen artist.
Pinaagi sa iyang pagkab-ot sa Top 4, napasidunggan dili lamang ang iyang kaugalingong abilidad kondili usab ang kultura ug identidad sa Subanen community sa Zamboanga del Norte. Gipakita niini nga ang mga lumad nga artist adunay dakong potensyal sa pagpakita sa ilang talento sa nasudnong entablado.
Ang maong kalampusan gilauman nga mahimong inspirasyon sa mga batan-ong artist sa probinsya nga ipadayon ang pagpalambo sa ilang talento ug gamiton ang arte isip paagi sa pagpasiugda sa kultura ug kabilin sa komunidad.(JENIFFER JR. DELICA)
Source: Zanorte News Flash