Natapos sa mga iskolar sa Rehiyon 9 ang unang DOST-SEI Scholars Research Camp nga gipahigayon sa Calamba, Laguna gikan Disyembre 3 hangtod 7, 2025, aron palig-onon ang ilang kahibalo ug kasinatian sa tinuod nga research work.
Gitudluan sila ni Dr. Aris C. Larroder sa hustong pamaagi sa paghimo og research nga angay ipatik, samtang si Dr. Randolf S. Sasota mitudlo sa pito ka lakang sa quantitative analysis ug sa paggamit sa decision tree sa pagpili og statistical test. Nakat-on usab ang mga iskolar sa paggamit sa Jamovi, usa ka libre nga statistical software nga gigamit nila sa pagpresentar sa ilang output ug pagdawat og feedback.
Gipahinumdoman sila ni Dr. Bernardo N. Sepeda sa importansya sa integridad ug responsibilidad sa pagbuhat og research. Si Dr. Inez Ponce de Leon misangkap kanila sa klaro ug epektibong pag-communicate sa siyensya, aron masabtan sa komunidad nga ilang giserbisyohan. Sa katapusan, si Dr. Jayeel S. Cornelio mituki sa yawe sa research publishing ug gidasig ang mga iskolar nga mopadayon sa pagpangandam, pagpangayo og feedback, ug pagdawat sa rejection isip bahin sa proseso.
Nanguli ang mga partisipante nga mas lig-on ang research skills ug mas dako ang responsibilidad isip umaabot nga mga siyentista.(JENIFFER JR. DELICA)
Source: DOST Regional Office No. IX