Aduna na usay dakong kalihukan ang ipahigayon dinhi sa Zamboanga del Norte sa natad sa sports gumikan sa hugtanong suporta ni Governor Rosalina “Nanay Nene” Jalosjos.
Sa nasayran gikan ni Mr. Gerson “Buddy” Cagbabanua, Provincial Sports Coordinator nga dinhi ipahigayon ang Perlas ng Silangan Basketball League (PSBL) National Finals karong Enero 16-19 diin maoy labing unang nahitabo sa tibuok Pilipinas gumikan sa paghatag ug higayon ni Nanay Nene.
Adunay 36 ka basketball teams ang magsangka niini nga magagikan sa sa Luzon, Visayas ug Mindanao. Kini ipahigayon sulod sa Zamboanga del Norte Convention and Sports Center. Dugang ni Mr. Cagbabanua nga ang mga players anaa sa 21-22 ang pangidaron nga kategoriya.
Si Governor Jalosjos ang mipaabot usab sa iyang pagpasalamat ngadto ni Dapitan City Mayor Seth Frederick “Bullet” Jalosjos sa iya usab hugtanong suporta sa maong basketball national finals. Nasayran nga adunay elimination games ang ipahigayon usab sa Dapitan City Cultural and Sports Center sa nahisgutang mga petsa.
Sa Enero 15, alas 5 ang takna sa hapon, ipahigayon ang Opening Program sa Zamboanga del Norte Convention and Sports Center diin gilauman nga adunay kapin sa 500 ka mga players, coaches nga nagagikan sa National Capital Region, Southern, Northern Luzon, Bacolod, Iloilo ug Negros Provinces sa Vusayas, SOCSARGEN, Davao, Agusan Del Norte, Misamis Oriental ug Occidental ug ingon man Zamboanga Peninsula Region. (Angelica T. Obina)
(Source: PIC-Sheng Jumalon Bala)