Nagpakita ug lig-on nga bayanihan spirit ang mga Zanortehanon human sila misanong sa panawagan sa tabang alang sa mga biktima sa Bagyong Tino sa Cebu. Sukad sa pag-anunsyo, daghang residente ang personal nga mitunol ug donasyon sama sa sanina, bugas, tubig, hygiene kits, ug ubang pang kinahanglanon sa Provincial Capitol.
Nagkahiusa ang mga empleyado, NGOs, eskwelahan, pribadong grupo, ug ordinaryong lumulupyo sa pagtapok sa ayuda. Ang League of the Municipalities of the Philippines–Zamboanga del Norte Chapter (LMP), pinangulohan nila Mayor Jed Quimbo ug Mayor Marissa Manigsaca, mitampo usab pinaagi sa pagpalit ug dugang hygiene kits, panapton, bugas, ug tubig.
Misalmot usab ang mga dakbayan, diin sila Mayor Roberto Uy sa Dipolog ug Mayor Evelyn Uy sa Dapitan aktibong nag-organisa sa ilang tagsa-tagsang komunidad aron masuportahan ang relief drive.
Sa dili pa ang 2025 KALAHI-CIDSS LCEs Forum karong Nobyembre 19 sa Cebu, andam nang ipadala sa probinsya ang duha ka dump truck nga puno sa donasyon karong Nobyembre 17. Ang mga Local Chief Executives ang personal nga motan-aw sa turnover ug distribution pag-abot nila sa Cebu.
Kini nga lakang, nagpabilin nga gamhanan isip mensahe sa Zanortehanon, kung magkahiusa, mas kusgan ug mas dali ang pag-abot sa paglaum ngadto sa nagkinahanglan.(IKEN B. GULLEM)
Source: Zamboanga del Norte Provincial News Network