Nadakpan ang usa ka gidudahang tigpayuhot sa ilegal nga drogas human sa buy-bust operation nga gihimo sa kapolisan sa Barangay Canduman, Mandaue City niadtong Hulyo 10, 2026.
Ang operasyon gipahigayon sa mga sakop sa City Intelligence Unit ug City Drug Enforcement Unit sa Mandaue City Police Office (MCPO), uban sa tabang sa Philippine Drug Enforcement Agency (PDEA) Regional Office 7. Nahitabo kini alas 8:45 sa gabii sa Zone 1 CCF.
Ang nadakpan giila lamang sa alyas nga “Pokyol,” nga giila sa kapolisan isip High Value Individual (HVI) sa ilegal nga drugas.
Narekober sa operasyon ang gibana-banang 500 gramos nga gidudahang shabu nga adunay kantidad nga ₱3.4 milyon, lakip ang buy-bust money ug ubang gamit nga may kalabotan sa ilegal nga drogas. Ang mga ebidensya gidala sa Regional Forensic Unit 7 alang sa laboratory examination.
Ang suspetsado gitanggong karon sa Police Station 1 sa MCPO ug giandam na ang kaso batok kaniya tungod sa gilapas nga Republic Act 9165 o Comprehensive Dangerous Drugs Act of 2002.
Matod ni PBGen Arnold E. Abad, Regional Director sa PRO7, magpadayon ang kapolisan sa mas kusog nga kampanya batok sa ilegal nga drogas aron mapanalipdan ang kaluwasan sa mga komunidad ug mapahunong ang kalihokan sa mga sindikato sa drogas sa Central Visayas.
📸 PRO7
I via Renante Socia Lada