Mipaabot sa ilang dakong pagpasalamat ang mga personahe sa Philippine Drug Enforcement Agency (PDEA) ngadto ni Governor Rosalina “Nanay Nene” Jalosjos kinsa maoy Chairperson sa Provincial Anti-Drug Abuse Council (PADAC) gumikan sa gipaabot nga suporta sa pagpahigayon sa Training of Trainers for Barangay Drug Clearing Program, Advocacy and Drug Free Workplace Program, Agosto 22-23, niining tuiga nga gipahigayon sa GFL Suites, Dawo, dakbayan sa Dapitan.
Tumong sa maong kalihukan aron sa paghatag ug gahum sa implementers sa Barangay Drug Clearing Program (BDCP) sa provincial, city ug municipal level ug uban pang stakeholders.
Sa mensahe ni Nanay Nene nga gipaabot ni Mr. Aurelio Monteclaro, Executive Assistant to the Governor kini nagkanayon nga ang Barangay Drug Clearing Program importante alang sa tinguha ngadto sa usa ka drug-free nga katilingban.
Gidasig ni Nanay Nene ang mga partisipante nga pahimuslan ang maong oportunidad aron makakat-on.
Samtang si Provincial Director Oliver Ombos sa Department of the Interior and Local Government (DILG) nga angayan ipagamay ang demand ug ipadayon ang pag-monitor bisan drug-cleared na ang maong lugar sanglit ang supply nagpadayon gihapon.
Lakip sa gitudlo sa mga mamumulong gikan sa PDEA mao ang pag-check sa application folders alang na sa maong katuyuan.
Ang maong kalihukan gipasiugdahan sa Anti-Drug Abuse Council, kagamhanang probinsyal sa Zamboanga del Norte ug sa PDEA ug gisalmutan sa ADAC sa mga kalungsuran ning lalawigan. (PIC-mbmontederamos with Raymond James Garrovillo-Photographer)
(Source: Provincial Information Center ZaNorte Facebook page)