Ang Sangguniang Panlalawigan sa Zamboanga del Norte nagpahayag ug hugtanong suporta sa plano ni Governor Rosalina “Nanay Nene” Jalosjos nga mabuksan pag balik para sa mga residente sa unang distrito sa Zamboanga del Norte ang Sergio Osmeña Sr. Municipal Hospital nga nasirad-an, tulo ka tuig na kapin ang nakalabay gumikan sa kakulangan sa mga doktor ug ubang rekisitos sa operasyon.
Kini human nga gidasonan sa mga membro sa Sangguniang Panlalawigan sa ilang regular sisyon April 11, 2023 ang tulo ka resolusyon nga giduso ni Zamboanga del Norte Second District Board Member Atty. Jasmin Pinsoy-Lagutin, kinsa mao ang Chairperson sa SP-Committee on Health and Sanitation.
Ang unang resolusyon mao paghatag og pagtugot alang sa pag-apply og Permit to Construct Sergio Osmeña Sr. Infirmary Facility nga maoy gikinahanglan para makuha ang License to Operate gikan sa Department of Health.
Ang ikaduhang resolusyon nga nakakuha usab og susamang suporta gikan sa SP mao ang resolusyon nga mag-usab sa pangalan sa Sergio Osmena, Sr. Municipal Hospital ngadto sa Sergio Osmeña Sr. Infirmary Facility subay sa mga gabayan nga gitakda ilalom sa DOH Executive Order no. 2012-0012
Samtang ang ikatulong resolusyon mao ang resolusyon sa Sangguniang Panlalawigan nga misuporta sa tinguha ni Gov. Jalosjos nga mabuksan og balik ang nasangpit nga tambalanan isip Sergio Osmeña Sr. Infirmary Facility.
Ang tulo ka mga resolusyon napalig-on sa Sangguniang Panlalawigan, human gipasabot ni Dr. Luayon ang kamahinungdanon sa pagbukas ug balik sa nasangpit nga tambalanan.
Ang Sergio Osmeña Sr. Municipal Hospital, nga dunay 10-bed capacity gigahinan sa Sangguniang Panlalawigan ug 13 milyones ka pesos niining tuiga.
Naglaum si Dr. Luayon, nga uban kang Dr. Vergara isip Acting Chief of Hospital, Dr. Lagorra-Pantinople ug Dr. Reconalla, kayang matubag sa Sergio Osmeña Sr. Infirmary Facility ang panginahanglang-medikal sa taga Sergio Osmeña, Piñan, ug Polanco, Zamboanga del Norte, ingon man mga residente sa silingang lungsod sa Josefina, Zamboanga del Sur.
(Source: Provincial Information Center ZaNorte Facebook page)