Giila ni Third District Board Member Hon. Kay Marie Bolando-Villarin ang pag-uswag sa serbisyong panglawas sa Salug isip usa sa mga mahinungdanong nahimo nga gipresentar atol sa unang State of the Municipal Address (SOMA) ni Mayor Dr. Ruth Maraon Brillantes.
Matud ni Villarin, dako ang nauswag sa sistema sa panglawas sa lungsod gikan Hulyo 2025 hangtod Hulyo 2026, nga nagpakita sa pagtagad sa administrasyon sa kaayohan sa mga Salugnon.
Gipasiugda usab niya ang padayong pagpalambo sa mga programa ug pasilidad panglawas isip timailhan sa paningkamot sa lokal nga kagamhanan nga mapaayo ang serbisyo alang sa komunidad.
Gidayeg usab ni Villarin ang desisyon sa municipal government nga mogahin og pondo alang sa pagtukod sa bag-ong municipal multi-purpose building, nga matud niya makatabang sa mga residente sa umaabot.
Nagpahayag usab siya og pagsalig nga padayon pang molambo ang Salug ubos sa pagpangulo ni Mayor Brillantes ug posible nga makab-ot sa lungsod ang status isip first-class municipality.
Gisaad ni Villarin ang iyang padayong suporta sa mga programa ug proyekto nga nagtumong sa kaayohan ug kalamboan sa mga katawhan sa Salug.(IKEN B. GULLEM)
Source: Zamboanga del Norte Provincial News Network