Gihatagan ug pasidungog sa Provincial Anti-Drug Abuse Council (PADAC) ang mga miyembro, partisipante, ug nagkalain-laing ahensya atol sa ikaduhang adlaw sa Provincial Workshop on the Formulation of the 2026–2028 Local Anti-Drug Plan of Action (LADPA) nga gipahigayon sa Top Pensionne, Dipolog City.
Gipanghatagan sila ug Certificates of Participation isip pag-ila sa ilang aktibong suporta ug kontribusyon sa kampanya batok ilegal nga droga, usa ka lakang nga nagtimaan sa paghuman sa duha ka adlaw nga workshop nga nagtumong sa paghulma sa bag-ong LADPA 2026–2028, subay sa direktiba sa Department of the Interior and Local Government (DILG) ug Dangerous Drugs Board (DDB).
Sa iyang mensahe, gisaysay ni PADAC Focal Person Engr. Dioscoro G. Endab, ang padayon nga suporta sa probinsyal nga pangagamhanan ubos sa liderato ni Gobernador Darel Dexter T. Uy sa mga programa kontra droga. Iyang gipasiugda nga ang kalampusan sa LADPA mag-agad sa kusganong koordinasyon ug panaghiusa sa tanang sektor aron makab-ot ang usa ka drug-free, luwas, ug malinawon nga Zamboanga del Norte.
Ang LADPA 2026–2028 magserbisyo isip giya sa mga lokal nga pangagamhanan ug ahensya sa lalawigan alang sa mas lig-on nga pagpasiugda sa koordinasyon, partisipasyon, ug epektibong pagpahigayon sa mga estratehiya kontra droga sa komunidad.(IKEN B. GULLEM)
Source: Zamboanga del Norte Provincial News Network