Mibisita ang mga opisyal sa Philippine Coast Guard (PCG) sa City Hall sa Dipolog City niadtong Pebrero 6, 2026, alang sa mga hisgutanan may kalabutan sa pagpalig-on sa panagtambayayong sa panalipod sa baybayon ug kaluwasan sa katawhan.
Ang delegasyon gikan sa PCG Marine Environmental Enforcement and Response Group–Southwestern Mindanao, nga gipangulohan ni Lieutenant Commander Roland T. Baria, uban ni PO2 Jose Raymund D. Patangan, Commander sa Marine Environmental Enforcement and Response Unit–Zamboanga del Norte, nakigtagbo kang City Vice Mayor Senen O. Angeles sa Opisina sa City Mayor.
Gihisgutan sa miting ang mga lakang aron mapalig-on ang kooperasyon tali sa lokal nga pangagamhanan ug sa Coast Guard, ilabi na sa pagpanalipod sa mga baybayon sa siyudad, pagseguro sa kaluwasan sa publiko, ug pagpanalipod sa panginabuhian sa mga komunidad nga nagsalig sa yamang-dagat.
Padayon nga gilauman sa duha ka panig ang mas lawom nga koordinasyon ug hiniusang mga kalihokan alang sa pag-amping sa kalikupan ug sa kaayohan sa katawhan sa mga coastal barangay.(IKEN B. GULLEM)
SOURCE: DIPOLOG CITY GOVERNMENT