Malampusong gipahigayon sa Corazon C. Aquino Hospital (CCAH) ning dakbayan sa Dipolog, ang operasyon sa mga pasyenteng dunay cleft lip/palate o mga bungi.
Kini human sa kasabutan sa lokal nga kagamhanan ug ang Advance Craniofacial Project Philippines, Inc. (ACPPI), pinaagi ni Dr, Rico Nebres, Presidente sa nasangpit nga organisasyon. Na uyonan nga mopahigayon og libreng operasyon ang kahugpungan ngadto sa mga kabus nga pasyente dinhi sa Dipolog.
Gisugdan ang pagpang-opera niadtong Hunyo 6 ning tuiga ug natapos sa Hunyo 9, diin adunay mokapin na sa 100 ka mga pasyente ang nakabenipisyo ning nasangpit nga misyon. Nasayrang gawas sa libreng operasyon, libre usab lakip ang mga tambal sa pasyente.
Dugang nasayran nga ang 11-member team  naglangkob sa mga espesyalista, nurses ug ubang personahe, diin nagdala sa ilang kaugalingon nga mga kagamitan alang sa nasangpit nga katuyoan.
Si Mayor Darel Dexter T. Uy kauban ang konseho ning dakbayan sa pagpangulo ni Bise- Mayor Horacio Velasco, ang hingpit nga mipaluyo sa nahisgutan nga medical team gikan sa kaulohan, tungod ug alang sa mga kabus nga pasyente ning dakbayan.
(Source: Dipolog City Government Facebook page)