Lagpot ang mga sakay sa motor cab nga mi tuyok-tuyok human kini hidasmagig single motor kagabie lamang, Abril 11, 2022 sa may alas 7:30 ang takna sa kagabhion sa dalang nasyunal South Curvada, Brgy. Galas, ning syudad.
Gilangkuban kini sa usa ka motor cab nga gipanag-iyahan ni Rico Balabat Beringuel, 60 anyos, nga walay driver’s license ug wala usab OR/CR nga maipakita sa mga otoridad.
Samtang ang motor single nga Rusi gipanag-iyahan sa usa ka Arnel Micaradayo Bularaon, 50 anyos ug lumulopyo sa Tungawan, Zamboanga Sibugay adunay driver’s license apan expired ug wala usab OR/CR nga maipakita sa mga otoridad atol sa hitabo.
Subay sa imbestigasyon sa traffic investigator sa Dipolog PNP nga si PSSG Romel Uycoco ang motor cab gikan sa birthday party sa Galas Beach sakay ang pamilya sa driver nga giila sila Teresita Berenguel, 55; Julie Medio, 39; Rejoice Roderos, 15; Faith Ester Roderos,19; ug Javin Medio 1; nga pulos lumolupyo sa Padre Ramon St., Estaka ning syudad.
Matod pa sa mga saksi sa mga panghitabo nga kining motor cab anaa na sa tunga sa highway ug paliko na unta sa wala nga bahin apan posible nga wala kini naka bantay sa nagpadulong nga motor single maong hiningdan nga mibangga kin isa motor cab.
Sa kakusog sa pagbangga mi tuyok-tuyok sa pipila ka minuto kining motor cab sa tungang bahin sa highway nga miresulta sa pagkalagput sa mga sakay niini.
Ug swerte nga wala’y nakabsan sa kinabuhi ilabi nga aduna pa silay sakay nga bata sa nahitabo nga disgrasya.
Dugang pang gi taho sa mga nakasaksi nga posible naa sa impluwensyang maka hubog ang driver sa motor single.
Ug karun ang mga biktima anaa pa nag paayu sa ilang mga pangos ug bun-og sa balay tambalanan. (Rigin O. Rusiana)