Nagpahigayon ang mga personahe sa Kalawit Municipal Police Station (Kalawit PNP) og usa ka dialogo ug pagpang-apod-apod sa Information, Education, and Communication (IEC) materials niadtong Agosto 2, 2025, didto sa Poblacion, Kalawit, Zamboanga del Norte, isip kabahin sa ilang padayon nga kampanya alang sa kaluwasan ug kahibalo sa kabatan-onan.
Gipasiugdahan sa maong kalihokan ang mga isyung panlipunan sama sa anti-terrorism, anti-rape tips, anti-bullying, ug mga balaod nga nagpanalipod sa mga kabataan batok sa abuso, eksploytasyon, ug diskriminasyon, lakip ang Republic Act 11313 o Safe Spaces Act, nga nagpanalipod sa tanan batok sa harassment sa pampublikong mga lugar.
Tumong sa maong kalihokan aron mapalig-on ang kapasidad sa kabatan-onan sa pagpanalipod sa ilang kaugalingon, pinaagi sa paghatag kanila og kasayuran, praktikal nga mga tambag, ug pagsabot sa ilang mga katungod ilawom sa balaod.
Pinaagi sa maong inisyatiba, gipakita sa Kalawit PNP ang ilang tibuok-suportang paningkamot sa pagpalambo sa kahibalo sa mga batan-on, aron sila mahimong responsableng miyembro sa katilingban ug aktibong kabahin sa pagbatok sa mga nag-unang isyung panlipunan nga nag-atubang sa ilang henerasyon.
Nagpabiling lig-on ang pasalig sa Kalawit PNP sa pag-edukar, pagpanalipod, ug pagpasiugda sa kahimsog nga kaugmaon sa kabatan-onan, pinaagi sa mga aktibidad nga nagtumong sa kaluwasan, edukasyon, ug katungod.(Jumalisa Papa)
Source: Kalawit MPS