Walo ka mga kahugpungan sa mag-uuma sa Zamboanga del Norte nga mga benepisyaryo sa Zamboanga del Norte Agricultural Extension Program (ZNAg) ang nakadawat ug baboy ug kalabaw gikan sa Kagamhanang-Probinsyal.
Ang Swine & Large Ruminants Ceremonial Turn-Over gipahigayon didto sa ZN-PAIC nga nahimutang sa Barangay Upper Irasan, Roxas, Zamboanga del Norte.
Ang Sinuyac Gulayan Farmers Association sa Sinuyak, Katipunan; Hi-Lander Farmers Association sa Matam, Katipunan ug Upper Irasan Farmers Association sa Upper, Irasan, Roxas mao ang nagpakadawat sa mga baboy, samtang ang mga kalabaw napunta sa Polanco AKHRO Farmers Association sa Sianib, Polanco; Bitoon Farmers Association, sa Bitoon, Sindangan; Tigbao Farmers Association sa Tigbao, Sindangan; ZNAG Upper Piao Farmers Association sa Piao, Sindangan; Dilawa Subanen Farmers Association sa Dilawa, Pinan.
Si Mr, Norman Alegarbes, miawhag sa mga mag-uuma nga ampingan ug atimanon ang ilang madawat nga mga hayop gikan sa Kagamhanang-Probinsyal, sanglit kini naman ang mamahimo nilang hinagiban sa ilang paglambo, isip katambayayong sa ilang pagpanguma.
Sa samang higayon, gidayeg ni Mr. Alegarbes sila si Provincial Agriculturist Ms. Maybel Bustaliño ug Provincial Veterinarian Dr. Sunday Dawn Bagatua sa ilang dedikasyon nga mapatuman ang tanang damgo ni Governor Jalosjos para sa Zamboanga del Norte.
Sa iyang bahin, gipahinumdoman ni Dr. Bagatua ang mga resipiyente sa maong mga hayop ug sa pagpahibalo gilayon sa iyang buhatan sa unsa mang suliran nga ilang masinatian sa pag-atiman sa maong mga hayop aron mosanay ug mapahimuslan sa ubang mga membro sa kahugpungan.
Ang ceremonial turn-over sa mga baboy ug kalabaw pormal nga gitapos pinaagi sa pagpirma sa kasabutan tali sa Kagamhanang-Probinsyal ug sa mga lideres sa kahugpungan sa mga mag-uuma.
(Source: Provincial Information Center ZaNorte Facebook page)