Giabiabi sa League of Cities of the Philippines o LCP ang bag-ong napili nga mga mayor sa siyudad sa 69th General Assembly ug mipili bag-ong han-ay sa National Executive Board sulod sa tuig 2022-2025 sa Crowne Plaza Galleria Manila, Dakbayan sa Quezon kaniadtong Hulyo 21, 2022.
Garbo sa Dakbayan sa Dapitan nga ang amahan sa lungsod si Mayor Seth Frederick P. Jalosjos nahimong Regional Representative sa rehiyon IX diha sa liga sa mga mayor sa tibuok nasud.
Lima ka syudad ang rehiyon nga mao ang Dapitan, Dipolog, Pagadian, Zamboanga ug Isabela.
Malipayong gidawat ni Mayor Jalosjos ang responsibilidad sa pagpangulo ug panaghiusa isip representante sa rehiyon.
Napili usab ang mayor sa Sugbu si Michael Rama isip bag-ong presidente sa LCP pinaagi sa usa ka consensus vote.
Ang LCP sumala sa Local Government Code niadtong 1991 ang pagmugna sa League of Cities naghatag og mas lawom, mas makahuluganon nga katuyoan sa mga miyembro nga dinhi ilang mapahayag ug mahisgutan ang mga makaapekto sa administrasyon ug pagdumala sa mga lungsod.
Kahibaluan, nga dunay 146 ka siyudad ang tibuok nasud sukad niadtong Septiyembre 7, 2019. Ug trenta-tres niini ang gitawag na highly urbanized cities, lima ang independent component cities ug ang uban component cities sa matag-probinsiya.
Source:DAPITAN CITY INFORMATION DIVISION