Pinaagi sa usa ka motorcade, pormal nga gisugdan sa Department of the Interior and Local Government (DILG) sa Zamboanga del Norte ang pagsaulog sa Local Government Code Month sa dakbayan sa Dipolog, gahapong adlawa Oktubre 13, 2025.
Kini misuroy sa nag-unang mga kadalanan sa Dipolog, ug nasundan sa usa ka mubo apan makahuluganon nga opening program.
Ang maong selebrasyon nagtumong sa paghandum sa pagsulod sa balaod nga naghatag ug gahum sa mga lokal nga panggamhanan pinaagi sa decentralization ug pagpalig-on sa lokal nga awtonomiya.
Sa mensahe ni Local Government Operations Officer (LGOO) VII Elmer Egama, iyang gipasabot nga ang tinuod nga diwa sa selebrasyon mao ang pag-alagad ug mga reporma nga makapaduol sa mga serbisyo sa gobyerno ngadto sa katawhan.
Ang Local Government Code Month ginasaulog matag Oktubre, subay sa anibersaryo sa pagpirma sa maong balaod.(IKEN B. GULLEM)
Source: PIA Zamboanga del Norte