Nagmalampuson ang gipahigayon nga “Livelihood Settlement Grant (Ahon Program) alang sa mga benepesyaryo sa nasangpit nga programa dinhi sa dakbayan Nobyembre 25, didto sa Dipolog City Sports Complex, Brgy. Olingan Dipolog City nga nagsugod sa may alas 9:00 ang takna. Ang maong kalihokan gipangunahan sa Department of Social Welfare and Development inubanan sa Kagamhanang Lokal ning dakbayan ug buhatan sa City Social Welfare and Development ilawom sa pagdumala ni City Social Welfare Officer, Ms. Arlene O. Jatico.
Ang kalihokan gitambongan ni City Mayor Darel Dexter T. Uy, kinsa mipabati sa iyang mahinungdanon nga mensahe ngadto sa mga benepesyaryo nga angay gayud nga ampingan ug dili sayangon ang maong kapital aron makatabang dili lamang sa adlaw-adlaw nga panginabuhi kon dili sa kaugmaon sa pamilya, uban sa pagpasalamat ngadto sa mga personahe gikan sa DSWD ug CSWDO sa supporta sa nasangpit nga programa.
Mihatag usab ug hamubo nga mensahe si SLP, Regional Program Coordinator Hja. Nursida Taradji-Sarail, kinsa mipasalamat sa kagamhanang lokal sa buhatan ni Mayor Darel ug mga staff nga mitabang niini ug naningkamot gayud aron matuman ang gihandum nga hinabang ngadto sa katawhan nga na-apektohan sa ilang panginabuhi agi sa bagyong Odette.
Nasayran nga mikabat sa 135 ka mga benepesyaryo gikan sa baynte uno (21) ka mga barangay dinhi sa dakbayan ang nakapahimulos sa nasangpit nga programa diin matag usa ang nahatagan og ayuda nga mikantidad sa ₱ 20,000.00 ka pesos isip kapital alang sa pagsugod sa ilang bag-ong panginabuhian.
(Source: Dipolog City Government Facebook page)