Sa labing unang higayon, natagamtaman sa mga residente sa Barangay Teresita, Bagong Silang, Luzvilla, Ubay ug Santa Fe ang ayuda gikan sa Kagamhanang-Probinsyal.
Kini human nga ang nagkahiusang mga Buhatan sa Kagamhnang-Probinsyal midala sa ilang serbisyo sa lima ka mga barangay sa nasangpit nga lungsod pinaagi sa Gugma-Ayuda ni Nanay Nene Outreach Program.
Ang pagpaabot sa ayuda gipahigayon sulod sa covered court sa Barangay Santa Fe Agosto 14, 2023 nga gisaksihan mismo ni Piñan Mayor Cely Jalosjos-Carreon, Executive Assistant IV Ms. Marjorie Jalosjos ug ang Ayuda Focal Person ug tigpamaba ni Governor Jalosjos nga si Atty. Ivan Patrick Ang.
Sa iyang mensahe, gipasalamatan ni Mayor Cely Jalosjos-Carreon si Governor “Nene” sa pagdala sa nagkalain-laing serbisyo sa lima ka mga barangay sa iyang lungsod.
Napahimuslan sa 493 ka mga residente sa lima ka mga barangay ang serbisyong gilugway sa Provincial Health Office, diin 370 ang nakapahimulos sa libreng medical consultation ug libreng tambal, 97 ang naibtan sa ngipon,18 ka mga bata ang natuli, ug 5 ang nahatagan ug covid-19 vaccination.
Katambayayong sa PHPO ang mga doctor ug ubang health personnel sa Sibutad ug Piñan Rural Health Unit ug mga personahe sa Provincial Disaster Risk Reduction Management Office.
Ang ubang mga personahe sa PDRRMO milugway usab ug libreng alot sa 32 ka mga indibidwal.
Gawas sa pagdalit sa lamiang champurrado, ang mga personahe usab sa Provincial Social Welfare and Development Office(PSWDO) maoy nagdumala sa pag-pang-apod sa 907 ka pakete sa tag lima ka kilong Princess Bea Rice.
Samtang ang mga personahe sa PROVET nanghatag ug vitamin supplement, purga ngadto sa 104 ka mga baboy ug 779 ka mga manok, 611 ang nahatagan og Rabesin ug 8 ka mga iro ang nahatagan ug ant-rabies vaccination.
(Source: Provincial Information Center ZaNorte Facebook page)