DIPOLOG CITY — Magpahigayon og libreng OB-Gyne check-up ang Zamboanga del Norte Medical Center sa Abril 13 sugod alas-8 sa buntag didto sa Outpatient Department, nga nagtarget sa kababayen-an ug mga nagmabdos sa probinsya.
Pagapangunahan ni Dr. Dino James Abong ang maong health mission nga nagtumong sa pagpalig-on sa maternal care ug reproductive health pinaagi sa libre nga konsultasyon ug sayong pag-detect sa posibleng sakit.
Ang kalihukan kabahin sa programa sa One Stop Assistance Center ug sa Provincial Government aron mapaduol ang serbisyong panglawas sa katawhan, ilabi na sa mga nanginahanglan og espesyal nga atensyon sa kahimsog sa kababayen-an.
Giawhag ang publiko nga moabot sayo tungod sa limitadong slots ug magdala sa ilang medical records aron mas episyente ang konsultasyon.(JENNIFER JR. DELICA)
Source: Zamboanga del Norte Medical Center