Gidala pa sa balay tambalanan ang usa ka lalaki human kini nakaangkon ug samad sa linubaan gahapon Abril 20, 2022 kapin kun kulang alas 3:00 sa kadlawon didto sa Mabini St. Barangay Barra, Dipolog City.
Giila ang biktima nga si Elarde Dela Cerna Ortilano, legal age, ulitawo ug lumulupyo sa Dicayas niining dakbayan.
Sa inisyal nga imbestigasyon, gibutyag nga mga alas 2:40 sa kadlawon gahapon, samtang ang biktima naglakaw sa kadalanan sa Mabini St. sa gihisgotang barangay, matud pa giduol siya sa suspek ug giluba sa nagkadaiyang parte sa lawas gamit ang usa ka kutsilyo sa walay sakto nga rason.
Naila ang suspek nga si Bernabe Cuevas, legal age ug residente sa Purok Pag-asa, Dipolog City.
Si Ortilano nakaangkon ug multiple stabbed wounds sa iyang kalawasan ug naconfine sa Zamboanga del Norte Medical Center alang sa atensyong medikal apan gibawian na kini sa iyang kinabuhi kaganihang buntag.
Sa pagkakarun, padayun pa gihapong gihimo ang hot-pursuit operation sa PNP personnel alang sa possibilidad nga pag-aresto sa suspek kansang niikyas human sa incidente.(Liccin V. Bello)