Ang Municipal Drug Enforcement Team sa Leon B. Postigo Municipal Police Station kauban ang 2nd Zamboanga del Norte Provincial Mobile Force Company ug 44th Infantry Battalion nagpahigayon og joint drug buy-bust operations sa Brgy. Talinga, Leon B. Postigo, Zamboanga del Norte alas 10:47 sa gabii niadtong Hunyo 18, 2023.
Ang operasyon miresulta sa pagkasikop ni Ricardo Lumo Malicay, 35 anyos, ulitawo nga adunay live-in partner, drayber, ug  residente sa Brgy. Tetuan, Zamboanga City.
Nasakmit atol sa operasyon ang walo ka sachet sa gituohang shabu nga gibana-banang motimbang og 1.1 gramos ug standard nga presyo sa drugas nga PhP7,480.00, usa ka pirasong PhP500.00 nga gigamit isip marked money, usa ka unit sa cellular phone ug usa ka unit nga Mio 125 nga motorsiklo.
Ang mga nakumpiska nga butang gidala sa Provincial Forensic Unit alang sa eksaminasyon sa laboratoryo. Ang suspek anaa na karon sa kustodiya sa Leon B. Postigo Municipal Police Station alang sa tukmang disposasyon.
(Source: PNP ZamPen)