“Ang kalampusan sa pagpakgang sa krimen dili makab-ot sa kaliposan kung walay pagtinabangay gikan sa komunidad”, pamahayag ni PCol. Glenn Dulawan kalambigit sa nakab-ot nga estado sa peace and order sa probinsya sa Zamboanga del Norte.
Gibutyag niini nga mikunhod sa 76 sa tuig 2022 ang natala nga mga krimen diin adunay 2,334 kinatibuk-ang insidente kumpara sa tuig 2021 nga 2410.
Naglangkob sa 2,334 mao ang 343 Index Crime o krimen batok sa tawo/kabtangan; 1,153 sa Non-Index Crime o Special Laws; ug 838 sa Public Safety Indicator (PSI) o panghitabo sa trapiko ug disgrasya sa kadalanan.
Sulti pa ni PD Dulawan nga pulos mikunhod sa tuig 2022 ang mga kaso sa homicide, rape, physical injury, carnapping, motornapping, robbery, ug theft samtang mitaas usab ang kaso sa murder.
Ingon pa niini nga mikab-ot sa 81.45% ang crime solution efficiency pinaagi sa malampuson nga pagpasaka og kaso ingon man 98.11% sa crime clearance efficiency o regular filing.
Daghanan usab nga logistics accomplishment sa kapolisan ang nahitabo sa miaging tuig diin nagturn-over sa duha ka PNP Building sa Jose Dalman MPS sa Pebrero 3 ug niadtong Nobiyembre 8 sa Dapitan CPS samtang laing tulo ka mga pnp building ang padayon nga gitrabaho sa mga lungsod sa Liloy, Labason ug Kalawit.
Aron mas maduol ang kapolisan sa katawhan ug komunidad, gilusad ang MKK=K sa tanang mga police stations; gilusad usab ang KASIMBAYANAN o “Kapulisan, Simbahan at Pamayanan; aron matubag ang mga kabalaka sa kalinaw, kahapsay ug kaluwasan sa barangay adunay 691 ka mga Barangay Peacekeeping Action Teams (BPATs); nagpahigayon sa relief operations, feeding program ug pagdonar sa dugo.
Source: PROVINCIAL INFORMATION CENTER