Ang Influenza-Like Illness maoy pinakataas nga kaso sa probinsiya. Kini base sa report sa Zamboanga del Norte Provincial Health Office, (ZN-PHO) sa pagpangulo ni Dr. Eduardo M. Luayon, Provincial Health Officer II atul sa 2nd Quarter, Media Forum nga gipahigayon sa Mibang Hotel, Dipolog City, Hulyo 12 ning tuig.
Sa taho ni Ms. Cindy E. Rhudy, Provincial Disease Surveillance Officer, nga ang Influenza-like illness nitala kini’g 2,307 ka kaso sa tibuok ZaNorte.
Sa top 5 nga mga lugar nag-una ang Dipolog City nga adunay 453 ka kaso, gisundan sa Sindangan-415; Labason-313; Kalawit-201 ug ang Katipunan-156.
Matod sa PHO ang Influenza-like illness usa ka sakit nga sama sa trangkaso nga nailhan usab nga flu-like syndrome o mga sintomas nga sama sa trangkaso.
Sa laing bahin, ang kaso sa dengue nitala kini’g 2,065 gikan sa bulan sa Enero 1 hangtud Hulyo 10 ning tuig diin adunay 2 ang namatay niini.
Nag-una ang syudad sa Dipolog nga adunay 507 ka kaso sa dengue, gisundan sa Sindangan 237, Katipunan 159, Siayan 135 ug ang syudad sa Dapitan 129.
Ang duha ka gikatahong namatay gikan sa lungsod sa Sindangan.
Samtang ang sagad sa natapdan sa maong sakit nagpangidaron sa usa ka tuig hangtod 10 anyos.
Niini, nagpahigayon gilayon sa fogging ang PHO sa mga lungsod o lugar nga adunay taas nga density sa Aedes nga lamok sa pagpangulo ni Mr. Restie Kyamko, Sanitation Inspection IV, PHO Dengue Coordinator, aron sa pagpakgang sa mga lamok nga Aedes ug pagpakgang sa sakit nga dengue.
Dugang taho sa PHO, nga alarming na usab karon ang probinsiya tungod sa taas nga kaso sa Human Immunodeficiency Virus (HIV), nga adunay 385 na ka kaso ang natala sa probinsiya diin ang 129 niini nag edad 15 ngadto sa 24 anyos.
Ang HIV usa ka virus, mahimo kining mokaylap pinaagi sa pakighilawas, ug shared needles.
Mahimo usab kini nga mokaylap gikan sa ginikanan ngadto sa bata sa panahon sa pagmabdos, pagpanganak o pagpasuso.
Sa mensahe ni Dr. Jane Jaug, nga naningkamot ang PHO ug sa padayon nga pag implementar sa mga programa nga makahatag kaayohan sa maayong panglawas sa mga ZaNortehanons.
Nagpasalamat si Dr. Jaug ni Governor Rosalina “Nanay Nene” Jalosjos sa padayong suporta sa mga kalihukan ug programa sa PHO.
Kahibaloan, nga prayoridad ni Nanay Nene ang kahimsog sa panglawas sa iyang katawhan subay sa iyang panultihon nga “Misyo ko Tinuod nga Serbisyo”. (Angelica T. Obina)
(Source: PIC – Nena M. Garcia)