Gatusan ka mga residente gikan sa unom ka barangay sa Salug ang nakadawat og libreng serbisyo medikal atol sa ika-upat nga hugna sa medical-dental outreach mission, isip kabahin sa pag-obserbar sa ika-51 nga Nutrition Month Celebration niadtong Hulyo 28, 2025.
Gipahigayon ang kalihukan sa mga barangay sa Lanawan, Calucap, Dinoan, Balakan, Danao ug Tambalang, diin gipaabot sa katawhan ang mga serbisyo sama sa medical check-up, RUTF para sa mga buros, RIMO (Rice and Monggo) packs para sa mga malnourished, libreng medisina, ug feeding program.
Pinaagi sa medical bus nga gipadala gikan sa Kapitolyo Provincial ubos sa suporta ni Gobernador Darel Uy, daghang residente usab ang nakapa-ultrasound, x-ray, urinalysis ug UACR.
Ang maong medical mission gipasiugdahan sa Nutrition Office sa LGU-Salug ubos sa liderato ni Mayora Ruth Brillantes, timaan sa ilang padayon nga paningkamot sa pagpalig-on sa preventive healthcare ug nutrisyonal nga edukasyon.
Sa pakighinabi kang Mayora Brillantes, iyang gipasalamatan si Gov. Darel Uy ug 3rd District Congressman Ian Amatong sa ilang hugot nga suporta sa mga programang pangkalusugan nga direkta’ng nakabenepisyo sa katawhan.(Jumalisa Papa)
Source: ZNPNN