Gihatagan og dakong pagtagad ni 3rd District of Zamboanga del Norte Cong. Ian Amatong ang mga programa sa Department of Social Welfare and Development (DSWD) nga dako og natampo sa mga komunidad sa distrito.
Atol sa deliberasyon sa Committee on Appropriations alang sa proposed FY 2027 budget sa DSWD, iyang gipasidunggan ang Assistance to Individuals in Crisis Situation (AICS) ug Sustainable Livelihood Program (SLP) isip duha sa mga programa nga dako og benepisyo sa mga residente.
Matod ni Amatong, daghang kabus nga estudyante ang natabangan pinaagi sa AICS tungod sa pagka-flexible niini. Samtang, giila niya ang SLP nga mas nakapunting sa pagtabang sa mga tawo nga andam maningkamot aron makabarog sa kaugalingon, ilabina kadtong walay kapital alang sa panginabuhian.
Nanawagan si Amatong alang sa dugang nga pondo sa SLP human sa pagkunhod sa badyet niini. Gisuportahan usab niya ang paningkamot nga mapasig-uli ug madugangan ang pondo sa maong programa.
Apil usab sa iyang gihisgutan ang suporta ni Zamboanga del Norte Gov. Darel Uy sa SLP ug ang potensyal niini sa paghatag og dugayng panginabuhian sa mga residente.
Gipasalamatan ni DSWD Secretary Rex Gatchalian si Amatong sa iyang suporta, ilabina sa panawagan alang sa dugang pondo sa SLP ug sa repair and maintenance sa mga pasilidad ug kagamitan sa ahensya.(IKEN B. GULLEM)
Source: Team Adrian Amatong