Gitanyagan sa Department of Science and Technology IX (DOST IX ) og ₱552,460 nga pundo ang Multi-Dimensional Assiduous Mothers Association (MAMA) sa Barangay Miputak alang sa pag-upgrade sa ilang pasilidad sa paghimo og bibingka kaniadtong Septiyembre 21,2026.
Ang maong proyekto gipirmahan pinaagi ni BLGU-Miputak Punong Barangay Raymund Yu, samtang si DOST-IX Provincial S&T Director Nuhman M. Aljani maoy mipirma alang sa ahensya diin girepresentahan usab sa MAMA ang asosasyon pinaagi sa ilang presidente nga si Mariane May Ella L. Samarinta.
Pormal nga giduso ang proyekto pinaagi sa Memorandum of Agreement (MOA) tali sa Department of Science and Technology IX (DOST-IX), Provincial Science and Technology Office–Zamboanga del Norte (PSTO-ZDN), ug Barangay Local Government Unit (BLGU) sa Miputak.
Ang pondo gikan sa DOST Grant-in-Aid (GIA) Program ug gamiton sa pagpaayo ug pag-standardize sa produksiyon sa bibingka sa MAMA, lakip ang pag-upgrade sa production facility ug packaging.
Pinaagi niini, gilauman nga modako ang kapasidad sa grupo sa paghimo og produkto, mas matubag ang panginahanglan sa merkado, ug makapalambo og bag-ong mga produkto nga mahimong dugang pang panginabuhian sa mga miyembro.
Gipakita sa proyekto ang padayong suporta sa DOST sa mga lokal nga organisasyon aron mapalambo ang ilang produksyon, mapalig-on ang panginabuhian, ug maablihan ang dugang oportunidad sa merkado.(MEDALYN U. BORJA)
Source: DOST Regional Office No. IX