Ang Provincial Office sa Department of Labor and Employment (DOLE) sa Zamboanga del Norte gikatakdang mopahigayon og Technical and Advisory Visit (TAV) alang sa mga gagmay’ng estalishmento nga nagnegosyo sulod sa D’ Food Hub and Events Center sa Dipolog Boulevard karong umaabot nga Setyembre 4, 2025, gikan alas 1:00 hangtod alas 4:00 sa hapon.
Kini base sa sulat nga gipadala sa City Information Office (CIO) sa maong dakbayan nga pirmado ni Ms. Aileen B. Mondejar, Labor Employment Officer Chief sa DOLE.
Sumala pa, ang maong kalihukan maglakip og orientation seminars ug site visits nga ipahigayon sa mga gi-train nga personahe sa DOLE. Ang tumong mao ang pagtabang sa mga micro entrepreneurs aron mas maila nila ang nagkadaiyang programa alang sa panginabuhi ug mapalig-on ang ilang kita, samtang gisiguro usab ang ilang pagsunod sa mga palisiya ug pamantayan sa pagpanarbaho.
Gidugang pa sa DOLE nga target nilang makapahimulos sa maong TAV ang kapin sa 80 ka mga partisipante, nga naglangkob sa mga mamaligya-ay, tag-iya sa gagmay’ng negosyo, ug ilang mga representante nga aktibo sa ilang patigayon sulod sa D’ Food Hub sa Dipolog Boulevard.
Ang maong inisyatibo gilauman nga makatabang dili lamang sa paglambo sa matag negosyo, apan sa paghatag usab og dugang oportunidad alang sa mga trabahante ug sa mas lapad nga komunidad.(Jumalisa Papa)
Source: Dipolog City Government