Gibuksan ang Dapitan Food Street kaniadtong Septyembre 04, 2022 sa may alas 6 ang takna didto sa Dapitan Mini Eco Park subay sa Sunset Boulevard sa Dapitan nga gipasi-ugdahan ni Mayor Seth Frederick P. Jalosjos.
Ang mayor mismo maoy nangulo sa pagbukas diin lakip sa mitambong mao si Congressman Romeo M. Jalosjos, Jr. sa unang distrito sa Zamboanga del Norte, ingon man City Tourism Officer Apple Marie Agolong diin ila nga gisuroy ug gisulayan ang mga nagkadaiyang paninda nga gitanyag gikan sa mga nagkalain-laing manindahay.
Temporaryo nga gisirado ang bahin sa Sunset Boulevard atubangan sa Dapitan City Government Center hangtod sa junction sa Road 31 (duol sa Dapitan City Hotel) gikan sa alas 6:00 sa gabii hangtod sa alas 12:00 sa tungang kagabhion human ang Sangguniang Panlungsod nga gipangulohan ni Vice Mayor Alfredo A. Sy nipalabang og ordinansa sa temporary closure aron mahatagan og lugway ang mga lokal ug ginagmay nga negosyante nga makabaligya sa ilang nagkadaiyang mga produkto nga pagkaon.
Isip paglingaw sa mga nangaon ug nagsuroy, gidalitan sa bag-ong natukod nga SBB Band nga mipasundayag gikan sa pagbukas kutob alas 10:00 ang takna sa gabie.
Si Mayor Bullet ang nagdapit sa publiko sa pagtagamtam sa sinemana nga dalit sa food street samtang ang siyudad nagduso sa subling pag-abri sa ekonomiya ug turismo human sa duha ka tuig nga pagpahulay tungod sa COVID-19 pandemic.
Source: DAPITAN CITY INFORMATION DIVISION Facebook page