DAPITAN CITY — Nagpagawas og traffic advisory ang City Government of Dapitan alang sa mga road closures sugod Abril 2 hangtod Abril 5, 2026 aron hatagan og dalan ang mga relihiyosong kalihokan sa Semana Santa.
Sakop sa isiradong mga dalan ang Fr. Sanchez Street, Gov. Carnicero Street, Dr. Heinz Luetkt Street, ug Fr. Hamak Street sa nagkalain-laing oras, ilabi na sa Maundy Thursday, Good Friday, Black Saturday ug Easter Sunday, diin ipahigayon usab ang Via Crucis nga moagi sa daghang kalsada sa syudad.
Sumala sa lokal nga panggamhanan, ang maong lakang gituman aron masiguro ang kaluwasan, hapsay nga dagan sa kalihokan, ug organisadong pagdumala sa trapiko samtang gilauman ang pagdagsa sa mga deboto ug bisita.
Gihangyo ang publiko nga magplano daan sa ilang biyahe, magpailob sa posibleng traffic disruption, ug makigkooperar aron maseguro ang malinawon, luwas, ug makahuluganon nga pag-obserbar sa Semana Santa sa Dapitan City.(JENNIFER JR. DELICA)
Source: City Government of Dapitan