Gipatuman sa Local Government Unit (LGU) sa Gutalac ang Road Rehabilitation Project sa Barangay Buenavista aron mapaayo ang kahimtang sa mga dalan ug mapalambo ang koneksyon sa mga komunidad sa maong barangay.
Ubos sa pagpanguna ni Municipal Mayor Eddie Justin Quimbo, gitumong sa proyekto ang paghatag og mas lig-on ug mas luwas nga dalan alang sa mga residente, nga makatabang sa pagpasayon sa ilang adlaw-adlaw nga pagbiyahe ug pag-access sa nagkadaiyang serbisyo ug panginabuhian.
Gilauman usab nga ang rehabilitasyon sa dalan makatampo sa mas episyenteng paglihok sa mga residente, ilabina sa pagbiyahe sa mga produkto sa uma ug uban pang panginahanglanon sa komunidad.
Gipasalamatan sa LGU si Punong Barangay Bonifacio Deniega ug ang tibuok Sangguniang Barangay sa Buenavista tungod sa ilang suporta, kooperasyon ug panaghiusa sa pagpatuman sa proyekto.
Agig padayong panagtinabangay sa LGU ug barangay officials, nagpadayon ang pagpatuman sa mga imprastraktura nga nagtumong sa pagpalig-on sa mga komunidad ug paghatag og mas maayong serbisyo ug oportunidad alang sa mga Gutalacnon.(IKEN B. GULLEM)
source: LGU Gutalac-Public Information