“Ayaw mo kabalaka kay daghan kaayong job opportunities ang mosulod diri sa Dipolog”, kini ang tipik sa mensahe ni Mayor Darel Dexter T. Uy atol sa pagbukas sa job fair buntag niadtong Abril 14 didto sa Dipolog Boulevard Commercial Building ning dakbayan.
Sumala pa niini, daghang mga investors ang mosulod dinhi sa Dipolog sa umaabot lakip na usab ang mga construction alang sa housing development ug uban pang mga dagkong negosyo diin kini makahatag og dugang employment sa lokalidad.
Tambag niini sa mga job seekers nga dili mawad-an og paglaom tungod kay ang Dipolog, bisan pa man sa mga ekonomikanhong krisis nga nasinati tungod sa pandemic, padayon gihapon ang paglambo niini tungod usab sa pagpanaghi-usa ug pagtibangay sa katawhan.
Samtang gibutyag usab ni Bise-Mayor Senen O. Angeles nga tinguha sa kagamhanang lokal ug konseho ning syudad nga tabangan ang mga lumulupyo aron mahatagan og desenteng trabaho ang matag usa, gani dunay ordinansang pandayon ang Sangguniang Panlungsod nga magmando sa mga establisimento nga mo-employ og dili mo-minus 60% sa ilang workforce, nga taga Dipolog.
Nasayrang adunay mokapin 2,000 ka mga posisyon sa lokal ug kapin 300 usab sa overseas ang bakante nga nagkinahanglan og mga skilled workers.
(Source: Dipolog City Government Facebook page)