Sa pag-abot ni bagyong “TINO”, gipaaktibo sa Coast Guard Station (CGS) Zamboanga del Norte ang ilang Deployable Response Group (DRG) uban sa mga Coast Guard Sub-Stations ug Operational Control Units aron ma-andam ang grupo sa daliang pagresponde sa posibleng epekto sa maong bagyo.
Gimandoan ang tanang personahe nga magpabilin sa standby mode aron makalihok dayon sa operasyon sa kalingkawasan ug pagtabang kon magkinahanglan ug emerhensiya sa kadagatan.
Samtang, gipahimangnoan sa Philippine Coast Guard (PCG) ang publiko, ilabina ang mga mananagat, nga magbantay ug mag-amping samtang nagapadayon sa ilang mga kalihokan sa dagat aron malikayan ang katalagman nga dala sa kusog nga hangin ug balod.
Nagpabilin nga alerto ug andam ang CGS Zamboanga del Norte sa pagpanalipod sa kinabuhi ug kabtangan sa kadagatan ilabina sa pagsugod sa di maayong panahon nga dala ni “TINO.”(IKEN B. GULLEM)
Source: Coast Guard Station Zamboanga del Norte