Usa ka importanteng milestone sa Philippine Army Reserve Force ang nahitabo atol sa donning of rank ceremony alang kang Maj. Darel Dexter T. Uy PA (Res), kinsa pormal nang gipataas sa ranggo nga Lieutenant Colonel (LTC) niadtong Septiyembre 28, 2026.
Gipahigayon ang seremonya sa Zamboanga del Norte Provincial Capitol human sa Monday Flag Raising Ceremony, diin miapil ang mga personnel ug reservists sa 902nd Community Defense Center (902CDC), 9th Regional Community Defense Group (9RCDG), Reserve Command, Philippine Army ubos sa pagpangulo ni Col. Mandy T. Libertino.
Gitambongan ang maong kalihokan ni MGen. Yegor Rey P. Baroquillo Jr.,Commander sa 1st Infantry (Tabak) Division, Philippine Army, isip keynote speaker, uban sa mga opisyal sa provincial government, Sangguniang Panlalawigan, mga empleyado ug mga residente nga nahimong saksi sa pormal nga pagpasidungog sa bag-ong ranggo ni LTC Uy.
Lakip usab sa mga mitambong sila BGen. Samuel G. Yunque, Brigade Commander sa 102nd Infantry Brigade; Col. Arnold L. Gasalatan, Group Commander sa 9RCDG; LTC Jimmy S. Sanz, Assistant Chief of Staff for Civil-Military Operations, G7 sa 1ID; LTC Jessie G. Bergonia, Commanding Officer sa 97th Infantry Battalion ug ubang mga opisyal ug enlisted personnel sa 902nd Ready Reserve Infantry Battalion.
Ang pagpataas sa ranggo ni LTC Uy nagtimaan sa iyang pag-angkon og mas taas nga responsibilidad isip senior officer sa Army Reserve Force, diin gilauman nga magpadayon ang iyang pag-alagad ug pagtabang sa mga buluhaton sa depensa ug serbisyo sa komunidad.
Ang seremonya nahimong higayon usab aron ilhon ang kontribusyon sa Reserve Force ug ang papel niini sa pagpalig-on sa koordinasyon tali sa Philippine Army ug sa mga komunidad sa Zamboanga del Norte.(MEDALYN U. BORJA)
Source: 902nd Community Defense Center Zamboanga del Norte