Siyam ka pamilya nga naapektuhan sa sunog sa Purok 4, Barangay Tuburan, Katipunan ang nakadawat og pinansyal ug pagkaon nga tabang gikan sa Provincial Government of Zamboanga del Norte niadtong Setyembre 29, 2026.
Ang matag pamilya nakadawat og ₱10,000 cash assistance ug lima ka kilo nga bugas aron makatabang sa ilang mga panginahanglan human sa insidente niadtong Setyembre 28, 2026.
Gihatag ang tabang ubos sa pagpangulo ni Governor Darel Dexter T. Uy, pinaagi sa Provincial Social Welfare and Development Office (PSWDO) nga gipangulohan ni Provincial Social Welfare and Development Officer Hannah Lou G. Mandates.
Naghatag usab si Katipunan Mayor Jose Michael “Maiko” A. Wong og corrugated roofing sheets ug ₱5,000 cash assistance sa matag usa sa siyam ka pamilya.
Napadali ang paghatag sa tabang pinaagi sa suporta ni Barangay Tuburan Captain Niño Deraele D. Necessario.
Tumong sa hiniusang tabang sa provincial ug municipal government ang paghatag og hinanaling ayuda sa mga pamilya samtang nagsugod sila sa pagbangon gikan sa epekto sa sunog.
Nagpadayon ang koordinasyon sa lokal nga pangagamhanan ug social welfare offices alang sa dugang nga tabang sa mga residente nga nanginahanglan human sa mga emerhensya ug kalamidad.(IKEN B. GULLEM)
Source: Zamboanga del Norte Provincial News Network