Dipolog: Bracelet sa usa ka abogado nga nagkantidad ug P40 mil gikawat, suspek arestado

0
15
photo courtesy of Dipolog CPS

Arestado sa kapulisan ang usa ka kawatan kinsa gikataho nga nagkawat sa bracelet nga gipanagiyahan sa usa ka abogado, mga alas 2:45 sa hapon, Hunyo 14, 2024, didto sa Barangay Dos, Katipunan, Zamboanga del Norte.

Ang suspek usa ka 24 anyos, Lalaki, ulitawo, ug residente sa Barangay San Antonio, Manukan, Zamboanga del Norte.

Samtang ang biktima nga usa ka abogado, mao si Atty. Philip Adrian Garcia Nazario, 31 anyos, lalaki, ulitawo, ug residente sa Barangay Sicayab, dakbayan sa Dipolog.

Base sa imbestigasyon, mga 2:15 sa hapon nianang adlawa nitaho sa buhatan sa kapulisan si Atty. Philip Adrian Garcia Nazario kabahin sa nawala nga usa ka unit nga bracelet nga bulawan nga nagkantidad ug P40,000 nga gibutang sulod sa drawer gikan sa iyang lawak.

Gilayon gikontak sa abogado nga biktima ang iyang stay-out house helper kinsa nanglimpyo sa iyang pinuy-anan niadtong Hunyo 12, 2024, nga gituohang responsable sa pagkawat sa iyang bulawan nga pulseras.

Nasayran,nga gisultihan sa suspek ang biktima nga gituyo niyang gikawat ang pulseras aron ibayad sa iyang obligasyon sa eskuylahan ug ang suspek niiyon nga iyang iuli ang gikawat nga pulseras ug personal nga itunol sa highway sa Munisipyo sa Katipunan gawas sa tunghaan sa JRMSU.

Gilayon nga giadtuan dayun kini sa mga perosonahe sa kapulisan pinaagi ni PSSg Necesario kauban ni PSSg Enon-Investigator ang lugar nga gihatag sa suspek.

Sa pag abot sa biktima sa highway sa nasangpit nga tunghaan, taud-taod niabot ang suspek ug nakig storya makadyot sa biktima ug human niini gi-turn-over ang gikawat nga bracelet.

Diha-diha dayun,giduol sa mga personahe sa PNP ang suspek ug gidakop.

Ang dinakpan gidala dayun ngadto sa Dipolog City Police Station alang sa dokumentasyon ug pagpasaka og reklamong kriminal. (Medalyn U. Borja)

(Source: Dipolog CPS)

Leave a Reply