Dali nga miresponde ang BFP Dapitan Emergency Medical Service niadtong Marso 11, 2026 human mahitabo ang usa ka aksidente sa kadalanan sa Barangay Sta. Cruz, Dapitan City, Zamboanga del Norte.
Pag-abot sa lugar, gi-assess sa EMS team ang usa ka babayeng pasyente nga nakit-an nga naghigda sa dalan ug adunay samad sa wala nga dalunggan ug mga pilas sa palad, tuhod ug tiil, samtang gituohang adunay dislocation sa abaga.
Gihatagan dayon og unang tabang sa mga bumbero ang pasyente pinaagi sa paglimpyo sa mga samad ug pagbutang og benda aron mapugngan ang pagdugo samtang gi-monitor ang iyang kahimtang.
Human niini, gidala ang pasyente sa Dr. Jose Rizal Memorial Hospital ug dayon gi-refer sa Zamboanga del Norte Medical Center alang sa dugang nga eksaminasyon ug pagtambal.(JENIFFER JR. DELICA)
Source: BFP R9 Dapitan City Fire Station