Gipahigayon ang groundbreaking ceremony alang sa concreting sa barangay road sa Purok Mamsa, Barangay Nangca, Rizal, Zamboanga del Norte, nga nagtumong sa pagpalambo sa koneksyon ug access sa mga residente sa komunidad.
Gipangulohan ni Barangay Captain Jonathan Jutba uban sa mga opisyal ug residente sa Barangay Nangca ang maong kalihokan, nga gitambongan usab ni Municipal Mayor Marissa Manigsaca, Sangguniang Bayan Members Al Manigsaca, Dennis Ibabao, ug Cristopher Jutba, apil si Municipal Engineer Engr. Jenifer Sagaray ug mga personnel sa Municipal Engineering Office.
Gipondohan ang proyekto ubos sa Local Government Support Fund–Growth Equity Fund o LGSF-GEF sa National Government. Pinaagi niini, gilauman nga mahimong mas luwas ug mas kasaligan ang pagbiyahe sa mga residente, ilabina panahon sa dili maayong panahon, ug mas mapadali ang pagdala sa mga produkto sa agrikultura ug uban pang panginahanglanon.
Gilauman usab nga makatampo ang proyekto sa pagpalig-on sa koneksyon sa mga rural nga komunidad, pagsuporta sa lokal nga kalihokan sa ekonomiya, ug pagpaayo sa access sa batakang serbisyo pinaagi sa panagtambayayong sa National Government, LGU-Rizal, barangay officials, ug komunidad.(JENIFFER JR. DELICA)
Source: Municipality of Rizal