Pormal nga gipahigayon sa Lungsod sa Sergio Osmeña ang pagpangbasbas sa bag-ong mga kagamitan sa lungsod, usa ka hinungdanong kalihokan nga nagtimaan sa pagpasalamat ug paglaum alang sa mas lig-on ug episyenteng serbisyo publiko.
Ang maong kalihokan nagpakita sa tinuod nga paningkamot sa lokal nga kagamhanan sa pagpalambo sa operasyon ug pag-atiman sa panginahanglan sa katawhan.
Gipangulohan ang seremonyas ni Municipal Mayor Hon. Glen N. Yu, uban ni Municipal Vice Mayor Hon. Ciddycriz C. Villamin ug sa mga halangdong SB Members, nga kanunay naghatag og suporta ug kooperasyon sa mga programa ug proyekto sa lungsod. Ang ilang panaghiusa nagpalig-on sa tumong sa paghatag og mas maayong serbisyo alang sa tanang Osmeñanon.
Ang mga bag-ong kagamitan simbolo sa kalamboan, kahandam, ug dedikasyon sa lokal nga panggobyerno sa matinud-anong pag-alagad. Pinaagi niini, mas mapaayo ang kahusayan sa trabaho, mas mapalapad ang serbisyo, ug mas masiguro ang kaayohan sa komunidad.(IKEN B. GULLEM)
Source: Municipality of Sergio Osmeña