DIPOLOG CITY — Makapahimuot nga talan-awon ang nasaksihan sa Dipolog Boulevard niadtong Enero 23, 2026, human gibuian pag-usab sa ilang natural nga puluy-anan ang 99 ka Olive Ridley sea turtle hatchlings, nga misugat sa kahinam ug kahayag sa mga nanan-aw.
Gibantayan ang kalihukan ni Officer-in-Charge Assistant City Environment and Natural Resources Officer Atty. Gratian Paul R. Tidor, uban ang Department of Environment and Natural Resources pinaagi sa Community Environment and Natural Resources Office Manukan Coastal Resources Management Unit nga gipangulohan ni Forest Technician Jim V. Montejar. Mitambong usab si City Environment and Natural Resources Officer Mercedita C. Guerrero ug mga residente nga mitan-aw sa natural nga pagpanlakaw sa mga hatchlings padulong sa dagat.
Kabahin kini sa padayong paningkamot sa City Government of Dipolog sa pagpanalipod sa mga pugad sa pawikan, pag-amuma sa mga hatchlings, ug pagpalig-on sa marine conservation. Pinaagi sa hugot nga koordinasyon sa mga ahensya sa kinaiyahan, gipasiguro sa lokal nga pangagamhanan nga adunay mas dako nga kahigayunan sa pagbuhi ang mga pawikan sa kinaiyahan.(JENIFFER JR. DELICA)
Source: Dipolog City Government