Nasikop sa hiniusang anti-illegal drug operation sa kapulisan ang usa ka 30-anyos nga lalaki human makuhaan og mokabat sa lima ka gramos nga gituohang shabu sa Purok Bularan, Barangay Miputak, Dipolog City, mga ala 1:35 sa kadlawon , Setyembre 21, 2026.
Ang dinakpan nga drug suspek naila nga si alyas “JM” residente sa Central Barangay, Dipolog City,kinsa gidakop pinaagi sa mga personahe sa Regional Drug Enforcement Unit 9 (RDEU9) uban sa mga operatiba sa Dipolog City Police Station.
Narekober gikan sa suspek ang lima ka heat-sealed transparent plastic sachets nga adunay puti nga kristal nga substansiya nga gituohang shabu nga may gibug-aton nga mokabat sa lima ka gramos ug adunay Dangerous Drugs Board value nga P34,000.
Apil usab sa narekober ang marked money nga ₱500, usa ka pakete sa sigarilyong Winston, ug usa ka puti nga Yamaha Fazzio motorcycle nga adunay plate number J982TB.
Ang mga nakumpiskar nga substansiya ipadala sa Zamboanga del Norte Provincial Forensic Unit alang sa laboratory examination, samtang ang suspek ipailawom sa drug test ug medical examination.
Sa pagkakaron, temporaryong gibalhog ang suspek sa Dipolog City Police Station samtang giandam ang inquest proceedings alang sa posibleng paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002 nga padayong giproseso sa mga awtoridad alang sa tukmang pagsang-at sa kaso batok sa suspetsado.(MEDALYN U. BORJA)
Source: COP Dipolog CPS