Balhog karon sa prisohan homan masikop sa mga tinugyanan sa balaod ang usa ka 47 anyos nga habal-habal driver mga alas 11:55 ang takna sa kagabhion niadtong Abril 6,2026 didto sa Relocation Site, Barangay Olingan, Dipolog City, Zamboanga del Norte.
Ang dinakpan nga suspek naila nga usa ka lalaki nga habal-habal driver,residente sa nasangpit nga lugar kinsa nalambigit sa nahitabong pisikal nga pagpanapat sa usa ka ginang nga usa ka 57 anyos nga babaye, balo, self-employed, ug residente sa Barangay Opao, Dapitan City, nga nagpaki tabang sa mga personahe sa Dipolog City Police Station human nakaangkon og samad nga dali usab nga girespondehan sa kapulisan diin sa pag-abot sa lugar, positibong giila sa biktima uban sa mga saksi ang suspek nga mao ang naghimo sa krimen, hinungdan nga dali kining gisikop.
Sa inisyal nga imbestigasyon, nagbutyag nga ang suspek ug ang biktima naglalis atol sa haya sa ilang namatay nga amahan.
Atol sa panaglalis, giingong miadto ang suspek sa kusina, mikuha og metal nga kawali, ug gituyo sa pagbunal sa biktima kaduha sa agtang niini, hinungdan nga kini natumba ug nawad-an sa panimuot.
Ang biktima daling gitabang ug gidala sa tambalanan alang sa hustong medikal nga eksaminasyon ug pagtambal sa nahiagom nga samad.
Ang suspek gibalhog karon sa kostudiya sa Dipolog CPS ug pasakahan sa tukmang kaso alang sa Serious Physical Injury ug Slight Physical Injury.(MEDALYN U. BORJA)
Source: ZNPPO