Adunay 257 ka mga rice retailers sa duha ka dakbayan sa Dipolog ug Dapitan ug 11 ka lungsod ning probinsya sa Zamboanga del Norte ang nakadawat sa ilang cash assistance kaniadtong Setyembre 27, Miyerkules nga gipahigayon sa Dipolog Sports Complex Olingan, ning dakbayan ug sa Dapitan Multi-Purpose Cultural and Sports Center sa Dapitan City.
Kini maoy ikaduhang hugna sa Cash Assistance for Micro Rice Retailers’ Payout gikan sa Department of Social Welfare and Development (DSWD).
Napaabot ang tabang pinansyal sa mga rice retailers dinhi sa Zambonga del Norte pinaagi sa ilang pagsunod sa Executive Order 39 ni Presidente Ferdinand Marcos, Jr.
Nasayran nga EO 39 nagmando kini sa price ceiling sa bugas sa tibuok nasud dili lamang ang pagpakunhod sa presyo sa bugas sa merkado kondili aduna usay ipahamtang nga silot ug makapawala sa kadasig sa pag-hoarding, sumala sa National Economic and Development Authority (NEDA).
Matag benepisaryo nakadawat ug ₱15,000 nga cash assistance isip ayuda sa ilang pang-negosyo, human misunod sa price ceiling nga 41 pesos matag kilo sa regular milled rice ug 45 pesos matag kilo sa well-milled rice.
Kini pinaagi usab sa koordinasyon sa Department of Agriculture (DA), Department of the Interior and Local Government (DILG), Department of Trade and Industry (DTI), ug DSWD Sustainable Livelihood Program ug sa dakong suporta sa atong Presidente Ferdinand “Bongbong” Marcos Jr.
Apan bisan pa man sila nakadawat sa maong ayuda, padayon pa gihapon ang pag-monitor sa DTI sa mga rice rtailers kung padayon pa gihapon sila mituman sa EO 39 hangtud kini ilibkas sa presidente.
(Source: Provincial Information Center ZaNorte Facebook page)