Adunay 19 ka mga kanhi membro sa walhong kalihokan nga mibalik sa sabakan sa balaod ang nakadawat ug tabang-pinansyal gikan sa Kagamhanang-Probinsyal ilalom sa administrasyon ni Governor Rosalina “Nanay Nene” pinaagi sa Assistance to Individuals in Crisis Situation (AICS) program.
Ang pagpanghatag sa singko mil pesos (P5,000.00) nga tabang-pinansyal sa mga Friends Rescued gipangunahan ni Assistant Provincial Welfare and Development Officer, Mr. Alex Sabal, kauban nila ni AICS Focal Person Ms. Mary Claire E. Sy ug Mr. Marc Richeleo Ang.
Kini gipahigayon sa covered court sa 97th Infantry Battalion nga nahimutang sa Barangay Del Pilar, Zamboanga del Norte Septyembre 4, 2023.
Sa iyang mensahe, giawhag ni Mr. Sabal ang mga FRs nga gamiton ang maong kantidad para sa ilang nanag-unang panginahanglanon, ilabi na sa nasinating pagtaas presyo sa mga palaliton, partikularmente ang bugas.
Gibalita usab ni Mr. Sabal sa mga FRs ang nagpadayong rehabilitasyon sa half-way house nga nahimutang sa Barangay Sta. Felomina, ning dakbayan sa Dipolog, nga mahimong ilang temporaryong pinuy-anan isip tipik sa pagpangandam sa ilang paghibalik sa normal nga katilingban sa umaabot nga mga adlaw.
Usa sa mga FRs nanawagan sa iya kanhi mga kauban sa kalihokan nga mobalik na sa sabakan sa balaod ug pahimuslan ang mga maayong programang gi-andam sa gobyerno alang kanila aron mahimong produktibong membro sa atong katilingban ug makab-ot ang damgo sa atong nasudnong kagamhanan nga kahiusahan sa tanan nga magdala kanato sa usa ka palamboon ug malinawong Pilipinas.
(Source: Provincial Information Center ZaNorte Facebook page)
