Andam na mosugod sa ilang trabaho ang 114 ka benepisyaryo sa Tulong Panghanapbuhay sa Ating Disadvantaged Workers (TUPAD) human sa orientation ug contract signing nga gipahigayon sa Government Center Lobby, nga nagpunting sa paghatag dayong panginabuhian sa mga pamilyang nanginahanglan.
Gipangunahan ang programa sa Department of Labor and Employment (DOLE) uban sa pakigtambayayong sa Public Employment Service Office (PESO) Dapitan. Aron masiguro ang hapsay nga dagan, gibahin ang mga partisipante—70 sa buntag ug 44 sa hapon—alang sa maayong pagdumala sa orientation ug pagpirma sa kontrata.
Mitambong si Mayor Evelyn “Belen” T. Uy ug nagpahayag sa iyang suporta, diin iyang gipahinumduman ang mga benepisyaryo nga gamiton ang ilang madawat nga kita alang sa panginahanglan sa pamilya. Human sa kalihokan, gidistribyut usab ang Personal Protective Equipment (PPE) kits isip preparasyon sa ilang trabaho nga magsugod sa Abril 27.
Sumala sa mga partisipante, dako ang ilang pasalamat sa DOLE, PESO ug sa lokal nga panggamhanan sa paghatag og oportunidad nga makadugang sa ilang kita bisan sa mubo nga panahon.(IKEN B. GULLEM)
Source: City Government of Dapitan