Nakadawat og ₱14 milyon nga pondo ang City Government sa Dipolog gikan sa Probinsyal nga Gobyerno sa Zamboanga del Norte alang sa implementasyon sa mga proyekto sa nagkadaiyang barangay, kini human gipahigayon ang pormal nga turnover sa tseke niadtong Pebrero 24, 2026 sa Zamboanga del Norte Convention & Sports Center sa Barangay Estaka.
Gidawat ni City Vice Mayor Senen O. Angeles, nga nagrepresentar kang City Mayor Roberto Y. Uy, ang pondo nga gitunol ni Governor Darel Dexter T. Uy kauban ang mga miyembro sa Sangguniang Panlalawigan. Mitambong usab ang mga Punong Barangay sa Minaog, Dicayas, Gulayon, ug mga benepisyaryong barangay sa maong ayuda.
Ang ₱14-milyon nga suporta ipahinungod sa mga prayoridad nga proyekto sa tulo ka barangay aron mapalambo ang imprastruktura ug batakang serbisyo sa komunidad.
Sumala usab sa kapitolyo, ang maong pondo nagpakita sa lig-on nga panagtinabangay sa probinsya ug siyudad sa pagpalambo sa grassroots development ug pagsiguro nga ang kauswagan maabot hangtod sa lebel sa barangay.(IKEN B. GULLEM)
Source: Dipolog City Government