Cebu City – Gimando ni Environment and Natural Resources Secretary Roy A. Cimatu ang pagsuspenso sa operasyon sa duha ka dolomite firms sa Lungsod sa Alcoy, Probinsya sa Sugbo, human sa gipahigayong inspeksyon , adlawang Biyernes Septembre 25, 2020.
Kini samtang gipaabot pa ang resulta sa imbestigasyon labot sa gi ingong resulta sa pagka daut sa coral reef, water quality montoring ug ambient air quality.
Gipahunong ni Cimatu ang Dolomite Mining Corporation (DMC) sa ilahang quarry operations ug ang Philippine Mining Service Corporation, usa ka processing plant sa Dolomite.
Iyang gitahasan ang Provincial Environment and Natural Resource-Cebu alang sa pagpahigayon ug coral assessment aron pagsuta sa health condition sa mga corals nga maoy unod sa reklamo sa lokal nga kagamhanan sa Lalawigan sa Sugbo.
Gimanduan sab ni Cimatu ang DENR- Mines and Geo-Sciences Bureau (MGB) sa rehiyon 7 pag convene sa Provincial Mining and Regulatory Board sa Sugbo nga ang Chairman mao ang MGB-7 Regional Director, aron pag tuki labot sa mining related concerns.
Atol sa inspeksyon kagahapon walay mineral processing ug shiploading operations sa lugar.
Ang DMC, maoy bugtong large-scale producer sa mga dolomite materials,nag hupot ug 25 ka tuig nga kontrata sa Mineral Production Sharing Agreement (MPSA) No. 208-2005VII ug adunay kapin sa 500 ka hektarya nga dolomite property sud sa Lungsod sa Alcoy ug Dalaguete sa lalawigan sa Sugbo.
Mapopos ang ilahang kontrata sa tuig 2030.
Samtang ang PMSC naka kuha ug mineral processing permit, MPP-007-2005VII nga mahuman sa tuig 2023.
Gitugtan sila alang sa crushing ug screening sa mga raw materials. (Jhon Tadlip)
(Source: Department of Environment and Natural Resources VII)