Bicol – Liwat na nangapudan ngunyan an Department of Environment and Natural Resources o DENR-Bicol sa publiko nin kooperasyon tanganing mapugulan an posibleng problema sa kapalibutan na dara kan presenteng pandemya.
Hasta ngunyan kaya problema pa man giraray soboot an halangkaw na volume nin basura partikular kan mga gamit na face mask asin face shield o an inaapod na na “household health care waste.
Paliwanag pa ni DENR-Bicol Communication Officer II Joan Mariscotes, an mga siring na basura an kaipuhan na ma-sgregate nin tultol dahil sa posibilidad na kontaminado ini nin virus.
Segun pa digdi, bako sana an salud kan mga residente an saindang ipigkokonsiderar kundi maging kan mga kolektor nin basura na soboot mas dobleng expose sa peligro na pwediser na darahon kan mga “mismanaged” na basura.
An mga ini soboot an maikokonsiderar man na mga frontliners na mayong takot man na nagluluwas sa mga kalsada o tinampo tanganing maglinig kun kaya dapat man na mapangatamanan an kapakanan kan mga ini.
Magigiromdoman na sarong press statement tinawan duon kan DENR chief an importansya kan responsableng pagtatapok nin “COVID-19 litter” urog na an gamit na disposable face masks dahil sa peligro na pigdadara kaini maging sa mga terrestrial and aquatic animals.
Katakod kaini, liwat na pinagiromdom kan ahensya an importansya kan pagpartisipar kan lambang pamilya sa tamang pagsisiriblag kan mga gamit na PPEs sa ibang solid wastes, kasabay an apelar sa mga lokal na govierno na magtagama man nin sadiring disposal areas para sa mga household health care waste sa saindang mga barangay.
(Source: DENR Bicol)