Ang Department of Environment and Natural Resources (DENR) nag-aghat sa mga lokal nga kagamhanan sa tibuok nasud nga dugangan pa ang pagrekaber ug pagpaminus sa mga malata nga basura.
Ang DENR nagsugod na sa pagkoordinar ngadto sa Department of Interior and Local Government (DILG) kabahin niini, kay ang pagrekaber ug pagkompos sa mga malata nga mga basura makatabang sa pagpagamay sa kadaghanon sa basura nga makolekta ug malabay, matud ni DENR Undersecretary Benny Antiporda.
Mukabat sa 52 hangtud 58 porsyento sa biodegradable o malata nga basura, ang magama sa atong nasud. Ang hustong segregation o paglahi-lahi sa basura mao ang mahinungdanon nga paagi aron mapagamay ang biodegradables, siya nidugang.
Ang segregation mao ang hustong pagdumala sa basura pinaagi sa paglahi-lahi sa nagkadaiyang mga materyales nga makita sa basura aron ma-promote ang pag-recycle ug pagre-use sa pwede pa magamit para maminusan ang kadaghanon nga makolekta ug malabay nga mga basura, kini basi sa Republic Act 9003 (Ecological Solid Waste Management Act).
Matud pa sa National Solid Waste Management Commission (NSWMC), ang malata nga basura pwede masagol sa yuta, tubig, hangin ug biological additives o activators aron makahimo og kompos.
Ang mga biodegradable waste naglakip sa mga salin sa pagkaon, panit sa prutas ug utan, liso, dahon, sanga sa kahoy, bukog sa isda, manok ug ubang mananap, matud pa sa NSWMC.
Si Antiporda niingon nga ang DENR nagplano nga mangayo sa LGUs og estado sa biodegradable waste sa ilang tagsa-tagsa ka mga lugar. Ang DENR gusto mahibalo asa ug giunsa sa mga LGUs paglabay ang ilang mga basura. “Ang usa ka butang nga gusto nato mahibaw-an, kon giunsa nila pagdumala ang ilang mga biodegradable waste,” siya nidugang. #TayoAngKalikasan (Gikan sa taho sa SCIS)